政情：高鐵西九站關近一年 政府填氹或耗4.3億
因應疫情嚴峻，高鐵西九龍站自去年一月底已關閉，至今接近一年。政府早前曾撥款補貼唔少行業，面對依家高鐵零載客量，有議員預料，政府「填氹」嘅金額或高達4.3億港元，又指港鐵認為係政府關閉高鐵站，希望可以增加賠償。
議員田北辰解釋，指根據港府同港鐵嘅協議，當高鐵載客量少於預期15%時，政府全資擁有嘅九廣鐵路需承擔70%虧損。佢就話，相關賠償合約應是以一年900多萬人次為底線，如人次少過770萬，政府就需要補貼車費差額約7成，以平均車費每人80元作計算，喺去年客量為零嘅情況下，港府須賠償4.3億元。不過佢又話，由於港鐵需要每年向政府畀2.7億元經營費，再加上職員薪酬等營運開支，預料港鐵未必能從中獲利。運輸及房屋局回應話，疫情下九鐵公司預計將按機制承擔部分風險，待確認上年實際客量再商討有關安排。
港鐵今年料首現減價
另外，田北辰又話，據佢了解港鐵票價喺今年或會出現首次減價嘅情況。佢話港鐵內部喺計算整體票價調整幅度後，得出約1.5%減幅，根據可加可減機制，整體票價調整幅度若得出嘅加幅或減幅逾1.5%，港鐵就可以自動調整票價；若少於1.5%則或要轉入下年度計算。