中環出更：響應捐血 容海恩元旦見紅
新年伊始，唔少人都會趁住元旦日做啲有意義嘅事，希望嚟緊一年有個好開始！之不過，大家做嘅嘢就未必夠議員容海恩（Eunice）咁特別喇，事關佢尋日就喺丈夫嘅陪同之下去咗銅鑼灣捐血。Eunice就話，依家疫情不斷反覆，各區捐血站嘅收血量持續偏低，所以就響應呼籲去捐血。
之不過，點解咁特別會揀喺新年流流「見紅」嘅？Eunice就解釋，話因為響應某團體嘅捐血活動，而咁啱活動就喺元旦日舉行咁話喎。佢提到，自己嘅血型係B，目前本港血庫存量比較少，所以佢本身都有定期去捐血嘅習慣。Eunice又話，每一日做多啲唔同嘅嘢，可以令疫情下嘅生活變得冇咁沉悶添！咁唔知新一年Eunice又有啲咩願望呢？佢就話，依家確診數字仲係維持一定水平，希望疫情可以快啲過去，經濟可以快啲恢復番。佢仲同卓妮講，佢今個月尾要應付考試，因此最近都花咗唔少時間去溫書。
議員張國鈞回顧過去一年就話，疫情無疑係影響好多人嘅生活，不過往好嘅一面去諗，其實舊年係畀到大家好多時間同父母子女相處，又期望新一年疫情盡快過去，香港繼續好似生猛嘅老虎一樣，能夠虎虎生威。
不惑之年 陳恒鑌被叫「哥哥」
人人都希望青春常駐，張國鈞嘅黨友陳恒鑌（Ben）喺元旦日就收到一份意外嘅喜悅。話說阿Ben上載短片，有小朋友喺街頭指住佢張橫額稱呼佢做「哥哥」。已經年逾不惑嘅「Uncle Ben」聽到之後當然係眉飛色舞啦。有網友睇到之後就留言話，心境年輕最緊要。而阿Ben除咗多謝呢位小朋友賣口乖之外，又祝大家健康快樂同埋安居樂業。
卓妮