中環出更：時裝潮流莫盲從 丘雪祺：配搭得宜顯氣質
為免衣着落伍，好多人都會緊貼時裝潮流。時裝設計師、傑青丘雪祺（Cecilia）就認為時尚固然重要，不過時裝潮流就恍如衣服嘅尺碼，未必所有人都適合，譬如曾經風行一時嘅豹紋同虎紋圖案，就唔係咁易Carry啦。畢竟貼近潮流之餘，又能夠彰顯個人氣質，先至係衣着之道，否則盲目咁追隨潮流，只會淪為「時尚嘅受害者」。
相較於個人服裝，Cecilia指為企業設計制服極具挑戰性，因為整齊同劃一嘅制服既要顯露企業形象，又要顧及不同崗位同年齡層嘅員工，如何準確拿捏真係好考工夫。儘管每個人嘅身材都有出入，但Cecilia話只要懂得配搭同運用視差，不論肥瘦都可以有唔錯嘅衣着效果。Cecilia又指，衣冠配搭要做到突出個人嘅氣質，時裝設計師就要先了解客人性格，至可以達到揚長避短之效，所以佢覺得自己嘅職業，同心理學家有啲相似。佢話一個人若衣着配搭得宜，外觀得以改善之餘，自信都有所提升。
王詩雅推茶葉雪糕 父親明踩暗撐
Cecilia喺時裝界嘅傑出表現，令佢得到金紫荊女企業家協會頒發「創意藝術企業家獎」予以表揚。香港菁英會副司庫王詩雅，就得到「世代傳承獎」。10年前接手家族生意，經營茶葉銷售嘅王詩雅話，茶葉買賣雖然係傳統業務，不過佢覺得必須追上時代變遷，3年前打算推出中西合璧嘅新產品，售賣含有茶葉成分嘅雪糕，然而當佢提出新構思，爸爸就大潑冷水話唔睇好。不過後來佢先至知道，其實爸爸係默默支持，又喺其他長輩面前肯定佢嘅做法。
至於籌辦今次頒獎禮嘅金紫荊女企業家協會，主席林淑怡（Mariana）話受到疫情影響，原定今年3月舉行嘅頒獎禮要延期到11月。今次頒獎禮共設有8個獎項同25位得獎者，Mariana指得獎人數雖較過往為多，但仍有卓越成就嘅揚眉女子，因界別設定之限而成為遺珠，因此協會會吸取經驗，來屆計劃增設更多獎項以表揚傑出嘅女企業家。
卓妮