政情：謀城門河放煙花 鄉議局又要撲水？
新界鄉議局盤數一向唔靚，皆因大樓需要維修，而且出租率未如理想，連近期嘅維修保養工程都要向執委會借逾十八萬元去搞。不過，尋日嘅執委會就有人建議喺城門河放煙花，乜鄉議局仲有錢搞咩？
荃灣鄉事委員會主席鍾偉平尋日喺會上匯報，為七一而搞嘅一連串活動，分別係文藝晚會、足球比賽、單車遊同埋鄉郊導賞遊咁，活動性質非常大路。
稱為新界人而搞 展示實力
不過，鍾偉平喺匯報完之後就作出建議，話以往喺馬場舉行嘅大型活動費用昂貴，而且面對唔少限制，認為可以創先河，考慮喺城門河放煙花，覺得活動係為新界人而搞，能夠展示出鄉議局嘅實力咁話。
主席劉業強就話申請放煙花程序要一年時間，而副主席張學明亦話十年前曾經搞過煙火匯演，即使當日落大雨都吸引過萬人入場，但佢就大潑冷水，指當年費用都過百萬，直指現時費用更加貴。
鍾偉平之後就話，搵到贊助唔怕做，但呢個都只係建議啫。到底新界有冇煙花睇呢，相信好快就知結果喇！