政情：研修訂內務守則 發問卷諮詢議員
立法會議事規則委員會上周二開會討論議員張國鈞就修訂《內務守則》嘅建議，希望力阻泛民議員喺議會拉布拖慢會議進度。上述委員會秘書昨日傍晚以電郵向全體議員發出問卷，指委員會邀請各議員對於張國鈞提出有關修訂《內務守則》嘅建議提出意見，議員需要喺本月23日或之前交回問卷。
問卷上列出張國鈞提出嘅修訂建議，當中包括限制委員會選舉正副主席嘅程序，需於30分鐘內完成，以及將專責委員會議案排喺議員議案之後。而每項修訂建議下，議員可選擇支持、不支持或沒有意見，並可提出其他建議。
料年底前完成修正案
委員會主席謝偉俊喺上周會議後表明，已經方向性通過張國鈞嘅議案，又話按照慣例，將用兩星期時間諮詢全體議員意見，之後再開會檢視行文，再交付內務委員會，預計年底前完成所有修正案。