政情：「安心出行」料使用率低 搞好健康碼仲實際

政府資訊科技總監辦公室將於本月中推出「安心出行」流動應用程式，市民可以透過掃描張貼喺特定場所入口位置嘅二維碼，記錄出行紀錄。如場所出現感染個案，應用程式就會向曾於相若時間到訪同一場所嘅用戶發出通知。

議員斥港府措施畏首畏尾

之不過，呢個應用程式都只係以自願形式供大眾使用，成效係點就真係惹來質疑。議員葛珮帆喺會上發言話，市民都希望本港確診數字盡快清零及重新通關，冀內地嘅經濟「內循環」可帶動本港經濟，但係依家政府提出嘅措施「畏首畏尾」。葛擔心，如果「安心出行」流動應用程式使用率低，未必能做到內地「健康碼」嘅成效，所以促請局方參考內地做法，準備只屬香港內部使用嘅「健康碼」，若出現新一波疫情政府就可以推行強制性措施。

記錄出行靠自律 成效惹疑

資訊科技界議員莫乃光就認為，如果市民將來去唔同嘅場所都要用「健康碼」，恐怕會惹來私隱問題。莫又關注政府未來推出嘅「健康碼」是否單純作為出入境用途，抑或會限制市民喺社區內自由出行。

創新及科技局副局長鍾偉強回應時就只係強調，當局為準備「安心出行」流動應用程式，正聯絡不同處所或的士營運商加強追蹤，同時亦會加強防疫工作。對於「健康碼」未來嘅用途，鍾只引述該局嘅局長薛永恒之前嘅說話，指推出「健康碼」只會作過關用途。但係莫乃光多次追問「健康碼」只作過關用途，係屬於局方嘅構想，抑或成個政府嘅共識時，鍾偉強一味迴避問題同埋反覆咁話「呢個係我哋立場」。

至於金融界議員陳振英就問及，點解喺最高危嘅公共交通工具中毋須張貼應用程式二維碼，但食肆、街市及運動場地就要呢？政府資訊科技總監林偉喬解釋話，希望喺所有政府場地都可以張貼，而街市作為政府場地，盼做法可鼓勵其他私人場地參與張貼二維碼計劃。至於計劃未有涵蓋地鐵及巴士，皆因衞生署認為市民乘搭公共交通工具期間唔會貿然脫下口罩。

另外議員黃碧雲亦關注到，至今約有39萬人曾佩戴檢疫手環，當中有幾多人曾涉及違規，例如脫下手環外出用膳。林偉喬回應指每月約有幾十宗違規個案，會通知衞生署跟進及處理。