政情：稱捉鼠不成非行會責任 葉劉被嘲卸膊
政府過去推出唔少政策都被指逆民意而行，唔少人都批評行政會議未有發揮作用。身兼行會成員嘅議員葉劉淑儀尋日出席一個電視節目時，提到自己不時被市民要求問責，但佢重申行會嘅角色只係智囊，仲用鼠患問題為例，形容政府部門執行不力並非行會責任。但呢番言論就得唔到市民支持，有網民嘲諷係「弱智囊卸膊」，亦有唔少網民提醒，擔任行會成員係有人工，叫佢哋唔好咩都扮路過，好似唔關自己事咁！
葉劉喺節目中就話作為行會成員，間中都會收到市民發出電郵指摘，要求佢哋問責；但佢就強調行會嘅角色只係智囊，只係畀意見，而唔係負責執行，仲話自己唔係推卸責任，只係自己的確冇資源同權力咁話喎。佢又以日前被申訴專員公開批評嘅鼠患問題為例，形容捉老鼠捉唔到嘅話，呢啲事行會管唔到。
網民唔收貨 斥白𢭃人工
之不過，唔少網民都對佢呢番言論唔收貨，又指出行會係集體負責制，提醒成員若果對政府執行政策有意見可以辭職，但就唔好扮咩都唔關自己事咁白𢭃人工囉！