政情：顏汶羽花3句鐘 化妝成骷髏
尋晚係萬聖節前夕，無論大人抑或小朋友都要扮到古靈精怪，出街玩先至可以盡興而歸。觀塘區議員顏汶羽（Frankie）亦都頗為應節，尋日佢將自己化妝成骷髏骨嘅過程上載Facebook。雖然化妝時間長達3個鐘，不過佢就話唔會以呢個骷髏骨造型行出街，到底點解呢？
唔敢落街 驚嚇親司機
原來Frankie嘅骷髏骨化妝，係個幾星期前嘅事。當時佢係搵年輕化妝師Psyche Ng幫手畫個特效妝，而骷髏骨嘅造型亦係由對方提出。由於以黑白兩色為主，化妝過程去到一半Frankie都覺得自己似功夫熊貓，不過當化妝完成，效果就真係好震撼，在場嘅同事都話Frankie如果唔落妝就揸車返屋企，恐怕會嚇親其他司機。所以Frankie話個骷髏骨化妝儘管花咗唔少心血，但都只係保留咗幾個鐘咋。
