政情：落選區議員 鄧銘心兩獲公職「安慰」
常言道：「上帝關了一扇門，就會開番一扇窗」，舊年喺區議會選舉中落敗嘅建制派區議員，好多人後來都獲政府委以公職。譬如屬於建制派嘅油尖旺區前區議員鄧銘心，連任失敗不久就獲政府委以公職，尋日佢又再度得到政府嘅青睞，成為大嶼山保育基金諮詢委員會嘅非官方成員。照咁睇，一次落選，換嚟兩個公職都好抵啊。
加入大嶼山保育基金諮委會
翻查資料，本身係土木工程師嘅鄧銘心喺舊年十二月三十日，畀政府委任做食水安全諮詢委員會成員，當時都有聲音質疑，係政府畀落選建制派區議員嘅安慰獎。估唔到事隔九個月，安慰獎仍然停不了，所以話落選有咩好怕喎，有政府關照咪得囉。
至於政府資料顯示，今次呢個新成立嘅大嶼山保育基金諮詢委員會，主要係負責為基金嘅行政運作畀意見，以及審核同監察基金資助嘅計劃。而發展局發言人就話，基金旨在推動同落實喺大嶼山郊區嘅保育工作，仲有喺一啲偏遠鄉村同社區進行小型改善工程，以支援保育措施。