政情：政府冷對體育界 甘文鋒：支援少到唔合理
本港體育政策一直都備受質疑，無論對教練、運動員甚至裁判嘅支援都相當不足，香港體操總會執委會成員甘文鋒就話，政府對體育運動方面嘅支援或補貼真係少之又少，可以話根本唔合理，促請政府盡快作出檢討，體育先可以發展得愈來愈好。
盼獲場地推廣跑酷
甘文鋒解釋，本港教練雖則話有部分係全職，但運動員及裁判就以兼職為主，而當呢批人要到外國參加比賽或做裁判時，不但要自行請假，就連飛機、酒店嘅費用都需要自掏腰包，無得全數報銷，佢坦言資助有關費用係好基本嘅嘢，但政府都做唔到，之後會向康文署爭取，港隊出外比賽應獲全額資助咁話。
甘文鋒作為跑酷（Parkour）技術委員會召集人，一直希望推行教練班，但由於疫情關係受到拖延，預料外國教練最快都要東京奧運後，先至可以到港開班，佢希望可以發展呢項運動，並推廣到社區及學校。
甘仲提到，政府應該提供多啲場地作Parkour Park，等有興趣人士多啲空間發揮，而佢自己來年都希望去東京奧運做Parkour裁判，惟佢喺一八年考獲嘅Parkour國際裁判牌，就因為去年撞正區議會選舉而錯過續牌試，所以要去就必須再讀一次裁判班先得啦。