政情：做台長無掛過10號波 林超英：天注定
今年風季似乎比過往平和，早前天文台原本預計會打風，不過隨後都話風暴似乎對香港嘅威脅唔大，最終連風都打唔成。講起打風，最期待嘅就一定係班打工仔喇，天文台前台長林超英亦趁機懷念下昔日時光，原來佢做台長期間冇掛過十號風球噃！
網上緬懷天文台大家庭
林超英早前喺社交網站發文，話自己雖然退休多年，但夢中仍然有天文台天氣會商嘅場面，又話先前同前台長岑柏討論應否「掛波」，仲喺電視節目見到多年來嘅同事，就係一眾天氣先生同小姐嘅回顧喇。林超英不禁感觸，話大家當年都曾經年輕過，而天文台對佢嚟講，唔單止係有關機械嘅工作，仲係一個大家庭。
一眾網民都同林超英一齊緬懷過去，細數以前充滿威力嘅颱風。有網民提到一九九九年嘅颱風「利奧」，林當時仲係署理台長，林仲留言回覆，形容呢個風係難搞到極啊！另外亦有網民留言問，林做台長期間都無掛過十號風球，算係幸運定係可惜呢，林就回應話係「上天決定，本來如是」。雖然佢就話係天注定，之不過做台長嘅時候冇經歷過十號風球，唔知又會唔會係一個遺憾呢。