政情：無顏面留任房會 郭榮鏗自己搣柴

屢唱衰香港 圖拖垮內會

自二○一二年起就擔任法律界議員，近呢一兩年直頭是非多籮籮，唔止捲入大規模DQ風波，自舊年立法會復會開始起計大半年，就被指多次利用內務委員會副主席負責主持會議嘅身份，阻擾內委會主席選舉，搞到內委會嚴重停擺成七個月，積壓咗大量法案同埋附屬法例，建制派同政府猛烈批評佢阻撓內委會選主席，甚至指佢涉嫌公職人員行為失當添！

唔止咁，過去郭榮鏗頻頻聯同有「民主阿婆」之稱的前政務司司長陳方安生等人外訪，包括去美國同德國等地「唱衰香港」，及後民主阿婆更被內地官媒炮轟為「叛國禍港四人幫」之一。

而喺內會風波過後，政府喺今年四月公布競爭事務委員會嘅新委員名單時，喺二○一八年獲委任做委員嘅郭榮鏗，當時就被告知不獲續任，當年同佢一齊被委任嘅委員，就有得繼續留低。雖然冇講點解被踢嘅原因，不過正正喺內會風波後就被踢走，相信原因都呼之欲出喇！

辭任所有委員會 再無公職

講番房委會，郭榮鏗喺二○一五年起就獲委任為房委會成員，一直都獲續任，喺上年獲續任後，原定任期由上年四月一日開始，直至明年三月三十一日。唔單止房委會成員，佢原本都係策劃小組委員會委員同埋建築小組委員會主席，依家就一次過辭任晒。而郭對呢件事冇回應。據了解，佢辭任房委會後，就再冇其他公職。

今次郭榮鏗喺房委會自我搣柴，時間上喺正DQ風波過後，好難唔令人聯想兩件事有關連，莫非佢真係意興闌珊，所以索性自行了斷，好過遲啲又畀人踢走？