中環出更：警PPRB換班 梁仲文接替江永祥
反修例風波期間，警民關係跌到冰點，警方開咗多場「四點鐘記者會」講解行動詳情同進度，有幾位警察公共關係科（PPRB）嘅阿sir成日亮相，做咗警隊嘅焦點人物，其中總警司謝振中喺上年十一月調任，佢嘅位置由郭嘉銓接手；至於高級警司江永祥同警司高振邦，就會喺今個月調任，分別由原駐守鐵路警區指揮官梁仲文同現駐守人事部嘅總督察張家寶接任，PPRB正式換班！
郭嘉銓上任後，正值示威衝突最嚴峻時期，佢先後主持咗十幾場「四點鐘記者會」，佢認為作為警隊發言人，要透過記者會將訊息傳畀公眾，澄清假消息。而為咗提升透明度，佢重新調整傳媒策略，致力重建警民互信。
高振邦往機動部隊受訓
而媒體聯絡及傳訊高級警司江永祥，自衝突開始至今共參與咗五十五次記者會，主力交代警方數字及應對傳媒提問。佢依家終於退下火線，調到香港輔助警察隊總部的輔警支援課，由下周一起喺九龍灣返工。江嘅職位將由現年四十二歲梁仲文頂替，佢喺尋日正式履新。
至於過去一年，經常西裝骨骨出現喺記者會嘅警司高振邦，今個月將調到警察機動部隊受訓，擔任「大隊長」率領一百六十九人隊員，受訓四個月後，會到行動部應變大隊駐守大約三個月，跟住調到西九龍總區機動部隊駐守，到時就會着住防暴裝親自上場。而四十六歲嘅張家寶將接替邦sir，月中會調職到PPRB。
卓妮