中環出更：考試成績非一切 陳兆焯：努力者皆狀元
考試成績名列前茅者，通常都被視為「狀元」。正生書院校長陳兆焯日前就趁着香港中學文憑試（DSE）放榜，於Facebook發文話要挑戰一下大家對「狀元」嘅刻板印象。佢話今年考DSE嘅四位正生書院同學全部都攞唔到5**，並非主流社會所定義嘅「狀元」，不過佢認為任何搵到自己人生方向，並為此努力向前嘅年輕人，都堪稱為狀元。
陳校長話每年DSE放榜，傳媒爭相報道嘅狀元不但成績獨佔鰲頭，且大多來自傳統名校，又或者即將入讀知名學府或學科。相較之下，四位正生書院同學並無耀眼嘅成績，但佢哋喺生活中經歷眾多挫折，甚至誤入歧途，仍願意重拾學習熱誠、面對困難仍勇於嘗試，實屬難能可貴。佢又話同學喺過去接近二十年嘅人生未必走得順遂、甚至乎遇上顛簸，但此刻仍然能夠確立生涯規劃同目標，已經係人生小測驗當中嘅一大成就，陳校長認為四位同學無論成績高低，都會為佢哋自我定下人生方向並奮力向前而感到自豪。
方國珊自爆當年放榜喊成豬頭
西貢區議員方國珊（Christine），就自爆昔日會考放榜嘅慘痛回憶。Christine話自細就鍾意游水、夾Band，父母並無對佢施加讀書同功課嘅壓力，結果快樂童年嘅代價，就係第一次會考成績好差。佢話唔溫書，成績係點都預咗嘞，不過一打開張成績單，都係喊到似豬頭，哀嘆「無啦，我人生玩完啦！」但幸好身邊有一班朋友仔，願意同佢一齊努力重讀一年，後來考A-Level仲攞咗兩個A添呀！Christine寄語DSE嘅同學，放榜「絕非定你生死」，就算成績優異，亦唔代表人生會一帆風順，更何況有好多待人處事嘅道理，有排學啊！
至於商務及經濟發展局副局長陳百里，就喺網上貼出自己高中時代嘅學生相，除咗祝願考獲佳績嘅同學，往後繼續成就各自嘅宏圖大志；亦鼓勵成績未如理想嘅同學毋須灰心，佢話逆境中只要自強不息，終會天道酬勤，荊棘過後就係坦途咁話。
卓妮