政情：「金牌領隊」接掌PPRB

警察公共關係科（PPRB）阿頭即將換班，現任總警司黃國偉將調去人事部服務條件及紀律科，而佢個舊崗位就由原本嘅東九龍高級警司（計劃）許鎮德調升出任。黃Sir離別在即，尋日相約傳媒茶敍，佢謙稱自己表現合格，可拎最佳進步獎，佢講「得獎感受」時笑稱：「呢個獎係屬於大家嘅！」

至於許Sir加入警隊二十七年，駐守過唔同環頭、西九龍機動部隊、支援科同保安部等，○七年初至一○年中曾任特首副官，之後調去東九龍，五日前先調到PPRB。原來佢仲係警隊羽毛球會主席，去年帶領警察羽毛球隊贏咗喺北愛爾蘭嘅世界警察及消防大賽金牌，可謂「金牌領隊」。

許Sir尋日在黃Sir手中接過負責同傳媒聯繫嘅手提電話，寓意順利「交接」，佢仲承諾會盡快投入新工作模式，即係「聽（傳媒）電話，同打電話！」