中環出更：黎智英縮沙 認街頭抗爭難 評論員鬧爆：再唱衰香港都冇用
《港區國安法》實施近一個月，壹傳媒黎智英尋日喺社交網站Twitter進行直播再度「唱衰」香港。佢承認現時街頭抗爭好困難，若要堅持抗爭，就需要將戰場轉移至立法會內。不過，佢又話勝出民主派初選嘅年輕人，部分表明唔簽署確認書，即使佢哋參加九月立法會選舉，隨時會被港府取消參選資格。有評論員直斥黎對造成今日嘅局面責無旁貸，即使繼續唱衰都無用。
話說喺直播中被問及港區國安法點解選擇今年實施，而唔係喺十年前推出時，黎話中國喺此時推出國安法係一個錯誤，唔少港人喺國安法訂立後感到害怕，考慮移民離開香港，令香港連串抗爭行動再受到影響。
黎隨後再唱衰香港，揚言香港若持續遭到中國破壞，只會顯示國安法嘅錯誤，並且引來更多國家聯合起來對抗中國，呢種情況將會係前所未見嘅。
香港亂局 黎責無旁貸
時事評論員陳雲生話港區國安法令過去影響香港十三個月嘅黑暴降溫，而正正係因為泛民過去多年喺度搞搞震，阻止《基本法》第二十三條立法，先會導致港區國安法嘅出現。佢直斥黎出錢出力搞亂香港，對造成現時局面責無旁貸。
陳又話依家國際上反對訂立港區國安法嘅國家只有二十多個，而喺聯合國安理會上支持立法嘅就有七十幾個。佢又話任何正常嘅國家都會理解立法原意，其他國家亦無權干預。
卓妮