中環出更：高官立會說「法」 朱凱廸潑婦罵街被逐
唔少議員都希望政府官員到立法會解釋《港區國安法》嘅條文細節，而立法會保安、政制同司法等三個事務委員會尋日召開聯合會議，等議員有機會向官員作出質詢。但民主派議員就重複追問港區國安法係咪凌駕於《基本法》同俗稱「特權法」嘅《立法會（權力及特權）條例》，其中議員朱凱廸仲因為侮辱官員而被趕離場添！
郭家麒被斥發言粗口都不如
喺會議上，民主派議員同官員嘅對話充滿火藥味，公民黨（公文袋）郭家麒發言時批評特首林鄭月娥今早稱國安法執行細則「保障人權」係「難聽過粗口」，又要求鄭若驊同李家超向港人道歉。李家超聞言即反駁，「郭家麒嘅發言粗口都不如」，不符事實；郭不滿李家超嘅回應，又反指李家超敗類。
朱凱廸喺會上因不滿律政司司長鄭若驊嘅回答，大鬧「廢話」，而保安局局長李家超同建制派議員幫手回答嘅時候，朱就如「潑婦罵街」，係咁侮辱議員同官員，結果被趕離場。
另外，仲有多位民主派議員輪流向鄭追問港區國安法係咪有凌駕性。鄭就直斥民主派議員「錯！誤導市民！」話部分議員對一國兩制存在誤解，強調港區國安法並無凌駕《基本法》，反而兩法「相輔相成」。議員葛珮帆就質疑民主派議員將兩法作比較嘅目的就係要誤導市民。
官員鬧毛孟靜言論誇大偏頗
而議員毛孟靜（毛婆）就質疑港區國安法會影響新聞自由，指「處處地雷」好容易踩界。李家超就大鬧毛婆嘅言論誇大以及偏頗，仲話無論係港區國安法定係基本法，都講明會保障新聞自由囉！
卓妮