中環出更：拉布拖累 禁加熱煙草案難產
今屆立法會會期即將結束，但受到拉布影響，仍然有唔少議案排住隊等審議，而立法會審議禁止加熱煙草案嘅法案委員會就決定唔再糾纏，宣布解散。
《2019年吸煙（公眾衞生）（修訂）條例草案》委員會主席郭偉強，尋日喺內務委員會會議上話，截至六月初，會上雖然集中討論有關建議禁止同限制加熱煙產品，但仍然未開展逐條審議嘅工作。另外，有委員表示將會就條例草案提出大量修正案，部分委員認為委員會喺立法會會期完結前，完成審議工作並唔可行，亦有部分委員認為，委員會應該盡可能加開會議，致力完成審議工作。最後法案委員會經表決後，決定停止審議工作。
冇議員反對中止審議
內務委員會主席李慧琼諮詢在席議員，對於法案委員會解散有冇意見，結果冇議員反對決定，禁止加熱煙草案就正式宣布胎死腹中，食物及衞生局話考慮喺新一屆立法會會期重提法案。
早前吸煙與健康委員會已經對中止審議草案表示非常失望同遺憾，話錯失今次立法機會，令到另類吸煙產品可趁機進入市場，形容係控煙政策嘅大倒退。
卓妮