中環出更：一萬蚊就到手 陳李玉佩籲捐贈困難家庭
疫情困擾香港幾個月至今未息，不但各行各業飽受衝擊，就連慈善機構嘅募捐活動都大受影響。九龍樂善堂主席陳李玉佩，就話佢哋原本打算喺三月份舉行賣旗日，但後來考慮到學生義工不應蒙受染疫風險，街頭賣旗就改為金旗認購，雖然都得到商界朋友嘅支持，不過籌款額就只及得往年賣旗日嘅三分一。
陳太話今年收到嘅善款無疑係少咗，但相較之下，唔少基層學生因疫情導致其家庭面對失業或開工不足，處境更為嚴峻。再過幾日，政府全民派錢嘅一萬元款項將陸續存入申請人嘅銀行戶口，陳太認為市民若非等錢使的話，不妨將款項之全部或部分捐出，而樂善堂以「零行政費」收集捐款後，就會轉贈至有經濟困難嘅學生家庭，希望可以協助佢哋度過困難。
周松東指今年籌募工作大受影響
仁濟醫院主席周松東，都話今年嘅籌募工作面對唔少挑戰，譬如佢哋有一個慈善義賣嘅活動，因顧慮義工安全同減少群眾聚集嘅風險，未能於商場同街道上設置義賣攤位，惟有集中網上銷售以及同商號合作寄賣。因缺少人與人嘅互動，善款數字梗係有影響喇！依家惟有寄望今年九月嘅遙距模型車格蘭披治慈善賽能順利舉行。周松東又話仁濟醫院好關注全癱病人及其家人，因為全癱病人需家人長期照顧，且經濟壓力相當沉重。市民嘅一萬元若到手後，周松東建議捐畀全癱病人基金，佢承諾所有捐款將唔會扣除任何行政經費，全數用於基金嘅援助工作。
兒童事務委員會非官守成員黃梓謙，早前就喺社交平台宣布，自己所得嘅一萬元將會響應良師香港及凝動香港體育基金等機構合辦嘅「以一萬成就百萬 助基層孩子抗疫」籌款行動，為受疫情嚴重影響嘅基層學生，喺疫情後提供校內支援、課後補習同身心健康嘅全面支援。佢又鼓勵市民一齊參與，撐港人下一代，改變基層學生嘅未來。
卓妮