政情：設關愛隊 馮驊充耳不聞 議員鬧爆：做唔掂就換人

無視問題 票站屢現重複排隊

喺指引出咗之後，唔少議員都炮轟馮驊不思進取，而梁美芬、麥美娟、葛珮帆同何君堯四個議員尋日喺記者會上話，舊年嘅區議會選舉受黑暴影響，導致過程出現種種問題，例如重複排隊、疑有票站人員將票箱帶返屋企、候選人受暴力對待等等，佢哋要求選管會喺即將舉行嘅立法會選舉中作出改善，好似喺票站設立關愛隊、有足夠人手確保候選人及義工安全，同埋喺票站內安裝閉路電視。

葛珮帆話好多意見認為投票時應該設關愛隊，仲話如果覺得設關愛隊對其他選民唔公平，不如全港所有關愛座都取消，因為對其他所有健全人士都唔公平啦！鬧爆選管會不作為，對此感到好遺憾，又批評當局繼續縱容唔公平、唔公正嘅選舉發生，對參選人安全同整體選舉公正性表示疑慮，如果選管會主席塞責，對建議繼續充耳不聞，特首便需要處理，做唔到就應該換人。

工作粗疏 登記冊失蹤逾兩年

梁美芬亦話馮驊拒絕所有改善建議，但又冇合理解釋，認為完全不可接受，又建議嚟緊選舉要增聘有經驗嘅票站工作人員，好似退休紀律部隊人員。麥美娟就提到葵青區偉盈選區嘅選民登記冊遺失兩年幾，到咗廉政公署要求交出登記冊協助調查時先被揭發，反映選管會工作粗疏，有關機制相當落後。

而何君堯就話舊年區議會投訴數字增加咗五、六倍，但點知馮驊竟然一成不變，強調所有建議無論實際上、技術上都冇問題，只係心態上嘅問題喎。

選管會：行動不便者可坐住等

今次選管會嘅反應都算快，尋晚回應投票站應設閉路電視嘅建議，話投票制度其中一項重要原則係不記名同投票保密，任何重要嘅改變必須有非常充分嘅理由，以免削弱公眾對選舉制度的信心，又話如發現有人懷疑重複排隊妨礙其他選民投票，票站工作人員會通知執法部門處理，而票站主任會安排座位讓行動不便嘅選民坐低，輪候領取選票。