中環出更：鄭若驊夫公司 領2474萬元補貼
政府早前推出第一期「保就業計劃」，尋日公布第二批已領取工資補貼的僱主名單，涉及三萬三千六百七十九名僱主。其中民望長期「墊司底」、被嘲為「避政司司長」嘅律政司司長鄭若驊丈夫潘樂陶，旗下嘅安樂機電設備工程有限公司，領取金額超過二千四百七十四萬元，係領取最多工資補貼金額嘅第十三名僱主，涉及九百四十一名僱員，平均每名僱員嘅工資補貼額約有八千七百六十四元。
夫婦曾被揭獨立屋多處僭建
競爭事務委員會喺去年十二月四日帶同搜查令，去到安樂機電設備工程有限公司嘅營業地點調查，指安樂機電設備涉觸犯香港法例第六百一十九章《競爭條例》第六（1）條下的第一行為守則，而安樂工程（01977）喺去年十二月亦都曾經停牌。不過，鄭若驊同潘樂陶嘅醜聞都唔係新鮮事，鄭喺二○一八年啱啱上任時，就被揭發佢同潘各自擁有嘅屯門海詩別墅獨立屋出現多處僭建，鄭最終獲「放生」，但潘就被控違反《建築物條例》，被裁定罪成同罰款兩萬元。
卓妮