中環出更：夏天愈嚟愈熱 史立德：需重環保減碳排放
香港嘅夏天向來炎熱，然而酷暑嘅日子似乎愈來愈漫長。卓妮早前喺沙田馬場見到香港中華廠商聯合會（廠商會）副會長史立德，佢憶述童年時代屋企冇冷氣，不過打大赤膊同撥扇散熱就已經可以安然入睡，反而依家有得歎冷氣，出面嘅氣溫就較舊時熱。要緩和溫室效應，恐怕要有人研發唔會排熱嘅冷氣機至得喇。
雖然呢種冷氣機唔知幾時至可以面世，不過史立德認為環保係當務之急，而佢亦摒棄傳統嘅內燃機汽車，改為以電動車代步，藉此減低碳排放，避免對地球造成污染。
施榮懷太太不時煲涼茶消暑
至於暑假嘅活動，佢話目前唔打算外遊，覺得香港同內地最安全，如果關口開番，就第一時間返內地巡視業務，畢竟依靠遙距視像會議，始終唔及得親自督師咁有效。
同樣着重環保嘅廠商會永遠名譽會長施榮懷，就話自己唔算怕熱，朝早一起床就立即熄冷氣，而太太就會不時煲涼茶、菊花茶畀一家人享用，平時亦會去跑步、健身等，踢波就會準備定啲冰水嚟解渴。佢最記得細個冇冷氣歎，同啲兄弟姐妹共用一把風扇、瞓覺就鋪竹蓆，簡簡單單就度過炎夏。施榮懷話年代唔同咗，依家啲後生仔好幸福，慣咗開冷氣享受。
轉過頭見到仁濟醫院前主席嚴玉麟，同佢太太嚴徐玉珊結伴到場。嚴玉麟認為天時暑熱，大家都要飲多啲水，同埋一定要做運動，強化體魄，但當然係要量力而為喇。而佢嘅消暑妙法，就係隨身帶備叉足電嘅迷你電風扇，嚴玉麟話自己盡可能都少開冷氣，慳番啲錢同電，為環保出一分力。
卓妮