中環出更：泛民立會初選內訌 梁耀忠收山
民主派打算喺下個月舉行初選，協調參選名單以迎戰今年九月嘅立法會選舉，然而初選都未開始就已經爭拗不斷。早前街坊工友服務處宣布參與民主派初選，但同時又話除初選結果外，亦要視乎民調先至決定是否參與立法會選舉，呢番言論隨即遭到各界連日炮轟，指違反初選協定。結果街工跪低，尋日發聲明宣布唔參選今屆立法會選舉，意味着現任街工議員、現年六十七歲嘅梁耀忠將會收山，唔會謀求連任。
街工本來有意派出四人名單參選新界西，排名單第一為街工主席盧藝賢，梁耀忠就排第二。但盧如何看待初選結果嘅言論就惹來諸多抨擊，甚至有街工區議員不滿兼退黨，其後又有多名參與新界西初選嘅人士發共同聲明稱「不會參與有街工參與的初選機制」。至於街工尋日所發嘅聲明，指參考民調嘅建議無法得到充分討論，對此深表惋惜，又稱從沒想過無視民主派喺新界西嘅共同協調，唔參選九月嘅選舉，係為咗表明街工並非戀棧議席咁話。
梁耀忠由一九九五年擔任立法局議員至今，同時亦係葵青區議會葵芳選區區議員，過去五屆均循新界西選區出選立法會，今屆就循俗稱超級區議會嘅區議會（第二）出選。廿幾年議員生涯中，梁耀忠最為人熟悉莫過於係做「逃兵」，喺二○一六年換屆後首次會議，因資歷深而要擔任代主席以選出立法會主席，點知突然臨陣退縮，惹來眾多網民大舉撻伐。
陳雲宣布退出社運
另外，被本土派稱為「國師」嘅嶺南大學中文系前助理教授陳雲（原名陳云根），尋日透過社交平台宣布退出香港社運，仲話今後會繼續學術研究、時事評論等。不過，佢選擇呢個時候退出社運，時間相當敏感，唔知佢淆底還是戴定頭盔呢？
卓妮