黎奕倫:希望一齊贏

早前因為新冠肺炎全球大流行的關係,世界各地的足球聯賽經歷了「停擺」,甚至腰斬。由於沒有賽事舉行,令生計全賴直播賽事如旁述、燈光、音響和撰稿等工種,一度陷入「冇工開、零收入」的慘淡期。NOW足球旁述員黎奕倫(Colun),與幾位好拍檔攜手「無中生有」成立了Zone D,透過製作不同類型的網上節目,為一班合作多年的手足製造開工機會。「有少少收入,總比完全冇收入好,希望大市環境會慢慢好轉,大家都唔使咁慘啦!」Zone D大旗手Colun謂。

「其實喺6、7年前,我已經同當時嘅一位生意拍檔講,網上平台係值得去發展嘅,只不過嗰陣時我哋專注喺製作公司嘅業務,就只係諗冇去做。之後想做發覺樣樣成本都好貴,就冇再諗喇。」被朋友稱他做「黎老闆」的Colun回憶道。「到早幾個月,我同依家嘅拍檔『阿Pitt』睇到,好多合作開嘅台前幕後手足,因為電視台冇波播就冇工開,一啲本身係跑散、冇底薪嘅就完全冇收入,幾個月都係咁好大鑊。所以就諗到不如我哋自己開啲節目,拍好就放上YouTube同Facebook,一方面當係開展網上平台嘅生意,一方面等啲手足有工開,唔係話好多錢,但有總比冇好吖!」就因為這個想法,Zone D在一個月前正式誕生了。

好兄弟出錢出力

Zone D與「兄弟」的普通話發音近似,Colun提到「成壇嘢」能夠開始,全賴多位「好兄弟」的支持。「除咗我同『阿Pitt』之外,出錢出力嘅仲有嚟自有線嘅『基仔』 (即劉健基)同『阿豪』(即張志豪),另外識咗好多年嘅『嘉諾』(即前香港隊教練郭嘉諾)都好幫手,用佢嘅人脈幫Zone D搵贊助,希望做落會不斷有志同道合嘅朋友加入啦!」此外,與Colun分屬多年戰友的劉舜文、陳韋茹(圓圖)、梁冠聰、劉嘉瑋和「車車」等等,皆應允以不同方式力撐Zone D。「都係嗰句啦!最希望做落去可以達到雙贏、三贏,甚至更多人可以贏,但短期目標起碼多啲人有工開先,之後條路點行就遲啲再算喇。」

由於搞手都是「體育底」,所以推出的節目都圍繞足球和籃球。至於剛剛的父親節,幾位爸爸主持的「YouTube爸」則屬新嘗試,內容逐步涉及其他範疇。「嚟緊仲會有好多新內容,再邊做邊調整,等遲啲港超聯開番,我哋都會有相關嘅節目推出,睇吓到時會唔會搵到Kannas同『司徒大導』上嚟做嘉賓,一齊玩啦!」

「車車」

「同Colun 、郭嘉諾佢哋幾個好朋友一齊做嘢已經好開心,自己一向都喜歡嘗試不同嘅工作,之前電台、電視台、舞台劇都接觸過,今次輪到網台。網台可以接觸嘅範疇更廣,自己就最想嘗試拍網劇。」

劉嘉瑋(Gary )

「我之前除咗喺收費電視台嘅體育節目做主持或者講波,都有拍吓片放上YouTube同Facebook,一直都覺得網台係有好大發展空間。今次Zone D會有好多不一樣嘅元素,值得大家畀心機去嘗試同開發,大家都多多支持啦!」

(相片由Zone D提供)