中環出更：老貓燒鬚 陳振彬：買股票曾蝕八位數
疫情肆虐重創環球經濟，唔少人都因應目前嘅市道而更改投資組合。雖則話投資可賺可蝕，但多數投資者都試過「賺則紙上富貴，賠就真金白銀」嘅慘痛經歷。卓妮尋日出席全港社區抗疫連線嘅活動，期間同總召集人陳振彬講起，原來佢投資股票都試過「老貓燒鬚」，蝕咗嘅金額高達八位數字，認真刻骨銘心！
本身有會計專業背景嘅陳振彬話自己過去買股票，一般都先參考上市公司公布嘅財務報表做分析，廿幾年前佢就試過見到一間公司盤數幾靚，於是就大手入貨，但最後佢就發現原來間公司盤數係假嘅，所以就賠本收場，而且金額都唔細，總共蝕咗八位數字。陳振彬話自己經此一役，以後投資股票除咗會睇盤數外，仲會留意公司高層成員嘅個人品格同信譽咁話。
揀親都錯 陳勇自嘲「投資明燈」
轉頭就見到九龍社團聯會理事長王惠貞同新界社團聯會理事長陳勇。陳勇就話，自己喺投資方面並唔算精明，仲大爆自己畀身邊啲朋友形容為「投資明燈」，通常自己睇啱邊啲投資項目，啲朋友就會特別小心提防；佢仲笑言做「明燈」都有好處，只要朋友所投資嘅項目，同自己嘅推介不符，一般都唔會出事。陳勇又提醒，喺依家投資環境咁唔明朗嘅情況下，大家更應該以穩陣為主。
眼科醫生周伯展就話自己喺投資方面比較遲鈍，兼且興趣唔大，目前亦都冇考慮過入市，至於過去嘅投資經歷，周伯展就話自己喺三十年前曾經玩過股票，但就不幸投資損手，甚至冇咗相當於一年工作嘅收入，自此之後就嚇怕咗，冇乜點樣投資喇！
卓妮