政情：催撥款研人工島 黃偉綸當民意冇到

議員批懶理風險 市民埋單

本港現時仍處於新冠肺炎疫情嘅陰霾之下，議員郭家麒話，本港正面對極大嘅財政壓力，面對疫情影響，政府嘅賣地收入亦因而減少。郭指明日大嶼填海工程嘅初步估算造價已經超過六千億元，相信最後埋單分分鐘超過一萬億元。由於填海工程浩大，「一開咗個頭就好難返轉頭」，加上社會同國際經濟環境不停改變，郭認為政府應該反思香港係咪真係仲需要咁多商業用地，全港市民都要為工程承擔好大額嘅費用，香港財政狀況負唔起呢個風險。

郭批評政府做事「假大空」，成日做一啲無意義嘅大白象工程，「洗腳唔抹腳」，冇優先將公帑用喺民生同醫療上，非常不負責任。郭又指，新界棕地同政府荒廢官地都有幾千公頃，應該先集中發展呢啲土地，希望政府唔好輕舉妄動，三思而後行，撤回撥款申請。

學者轟有地唔用 倒錢落海

理工大學專業及持續教育學院講師陳偉強都話，疫情影響下，政府動用財政儲備推出多項救市措施，令財政儲備將減至八千億至九千億元，政府已估計未來幾年會有財政赤字，因此應該保留儲備應對未來各項挑戰。陳指出，明日大嶼首階段將填海一千公頃，加埋發展相關基建，初步估計造價已經超過六千億元，假如政府仍然執意推行相關計劃，將會耗盡儲備。

陳又指，即使社會有唔少聲音反對推行明日大嶼計劃，但政府仍然漠視民意，「中部水域人工島研究要花五億五千萬元，都唔係少錢，政府唔應該為咗要面，夾硬將市民啲錢倒落海。」陳認為，要增加本港房屋土地供應有多個方案，例如發展棕地，甚至近日有傳由內地借出土地予港府喺珠海附近填海，呢啲方案嘅可行性都較明日大嶼計劃為高。

其實香港仍有好多閒置土地曬緊太陽，好似大埔工業邨鄰近嘅靚地咁，唔建屋又唔發展，擺喺度都唔知做乜，政府就一味嗌無地，係都要搵遠水嚟救近火，如果包括黃偉綸在內嘅高官搞唔掂嘅話，就快啲執包袱退位讓賢嘞！