政情：公民講場：旅業靠健康碼復工 陳肇始一味商討中

好多疫情趨向緩和嘅國家同地區，都正在部署名為「旅遊氣泡」嘅旅遊區域搶佔市場。而香港旅遊業界，就建議豁免強制檢疫，以粵港澳三地互認健康碼，以便「團進團出」嘅方式重啟旅遊。對於業界嘅主張，食物及衞生局局長陳肇始嘅回應，講來講去都只得一句「仍在商討中」。其實香港旅遊業遭到疫情衝擊尤為嚴重，目前正處於零收入嘅困境中，加上紓困措施始終有限，若果政府唔盡快處理旅遊業界嘅訴求，旅遊業嘅從業員唔知要等到幾時先至有工開喇！