中環出更:金魚染疫歿 李家仁答幼童:佢哋去咗旅行

綽號「小明」嘅兒歌醫生李家仁,其醫務所嘅金魚缸,早前爆發疫情,缸內嘅金魚逐一染疫繼而病歿。有小病人見魚缸空空如也,問金魚去咗邊?李醫生就話金魚去咗旅行。但當對方追問金魚去邊度旅行同埋幾時返,佢又點答好呢?

李家仁就話金魚去咗武漢,聽日就返嚟喇。李醫生話稚童未有生死觀念,惟有用呢種方式回應,不過話金魚會返嚟,呢句話又並非虛言,因為個魚缸以「堅壁清野」式抗疫已屆最後一日,翌日就可以迎來一批全新嘅金魚。講番今次魚缸疫情,李醫生憶述三個禮拜前,佢為魚缸添加兩條新金魚,誰知魚缸就此變成「疫區」,儘管李醫生都懂得為金魚施藥,然而法寶盡出亦無法挽狂瀾於既倒,於是佢索性將魚缸水抽乾,相關器具都使用酒精消毒並乾燥十二日,務求將病菌徹底杜絕,再迎來一批全新嘅金魚。

雖然有人同佢講,魚缸裏面嘅生命係為佢「擋煞」,不過李醫生認為講法並不可信,又指魚缸裏面亦有其「眾生相」,佢話過去曾有一條體形較大嘅黑牡丹,為生病嘅同類陪伴在側,後來患病嘅金魚不治,該條黑牡丹就喺中水發呆,所以佢認為金魚都係有靈性嘅生物。

林青:魚缸可構建自然循環系統

香港福建三明聯會副會長林青(Erica),就話金魚其實好醒目,譬如佢一踏入家門,魚缸裏面嘅眾多金魚就會面向門口,以求惹人注意並施以餵飼。不過佢所飼養嘅金魚就較為偏食,並非所有魚糧都適合。Erica又話,只要懂得構建一套自然循環系統,以螺同水草嚟清理金魚排泄物同過濾水質,咁就可以免除濾水器。但前提係魚缸體積、螺同水草嘅布置以及金魚數量都要拿捏得恰到好處。

香港醫療專業人士協會創會會長江明熙,自小就要負責清理家中魚缸,對飼養金魚甚有心得,不過當佢搬咗屋後就再冇養金魚,因為現時嘅居所頗接近海邊,過去來自魚缸嘅水族世界,今日已由海洋所取代。

卓妮

第一手消息請下載on.cc東網iPhone/iPad/Android/Windows Phone Apps