政情：彭定康陰魂不散亂噏博撈油水
香港回歸二十年，但係末代港督彭定康一直陰魂不散，藉着對香港事務說三道四、指指點點，提高個人曝光率，最近仲出埋回憶錄撈油水添！佢除咗繼續老調重彈，話《基本法》及《中英聯合聲明》已被違反之外，仲提到新一任嘅特首由中央屬意嘅人當選，但係佢嘅支持率只係其中一名對手嘅一半，而呢名對手喺中央眼中係錯在提出要同民主派對話，擺明針對候任特首林鄭月娥（林鄭），暗寸林鄭喺特首選舉中，民望唔及另一候選人曾俊華高。彭定康頻頻撲出嚟噏三噏四，其實只係為新書宣傳，想賺多兩個錢就真。
疑為新書宣傳
彭定康將於本月底推出回憶錄，憶述自己政治生涯中出任唔同崗位，包括環境大臣、港督、歐盟外交事務專員等嘅經歷，所以最近頻頻蒲頭。尋日刊登嘅一篇報道，就指彭定康提到新任特首，話新任特首嘅支持率不及對手嘅一半，而呢名對手就係錯在提出同民主派對話，批評中央喺「一國」之下，愈嚟愈執意於「一制」。彭定康又質疑，《中英聯合聲明》以及《基本法》已被違反，佢以「銅鑼灣書店事件」為例，話有香港人被內地官方人員擄走，香港法律自主權受到侵蝕，又批評英國政府對呢啲事鮮有發聲云云。
對於香港近年港獨思潮出現，彭定康就話，中國封閉及敵外心態除咗強化「香港公民」理念之外，亦令要求香港獨立嘅聲音出現。不過佢就認為，港獨係唔可行嘅，仲認為港獨只會削弱對民主嘅支持，有利中央強硬派，令香港喪失國際社會嘅理解。
言論了無新意
彭定康又話，香港仍然能夠維持到法治同司法獨立，但一啲將香港公務員隊伍政治化，同埋將警隊用作政治目的嘅舉動，終會帶嚟負面影響。如果內地可以講到明，相信香港人有能力處理好香港事務，咁就會有助紓緩香港人嘅不安思緒咁話。
大家聽完，係咪覺得彭定康呢一番言論了無新意呢？不過佢即將出回憶錄，香港係佢仕途中嘅其中一站，人哋鍾意搞三搞四博宣傳，冇計喇！