政情：巴士加班次改條件 田二少踢爆數字遊戲
搭巴士「逼沙甸魚」可謂學生哥同上班族嘅生活日常，而運輸署近來就提出巴士載客率改革，同更改加班次條件。但議員田北辰（田二少）計過條數之後，就話唔收貨喎。
田二少尋日喺社交網站列出一堆數字，指運輸署提出巴士載客率改革，加班次條件係由目前繁忙一小時載客率由八成五（巴士達到廿七個企位乘客），減到七成五（十三個企位乘客）。不過田二少就踢爆，話睇數字好似係無咁擠迫，之但係返工返學同放工放學嘅繁忙時間，高峰期係大約半個鐘左右，若果逼完嗰半個鐘先加班次都係無補於事。因此佢要求用半個鐘計，企位多過十三個人就要加班次，如果唔係就唔叫舒適旅程咁話。
根據田二少提出嘅方案嚟計算，巴士公司大約要加多一百架巴士。佢溫馨提示如果公司想同港鐵競爭，遲早都要加呢啲巴士，如果唔係啲人逼唔上巴士，服務質素又唔夠，啲人都係會揀港鐵。