政情：立會流會極速復會 泛民點人數被廢武功

修改《議事規則》剪布

過往立法會大會上，若有議員提出點算開會法定人數，十五分鐘後都唔夠全體議員嘅一半在席，主席就會宣布流會，而會議亦都唔會再於短時間內召開。當時民主派就會用呢招拉布阻礙審議部分有爭議性嘅法案。不過，二○一八年時，建制派提出修改《議事規則》剪布，其中一招就係主席可以喺流會後，隨時召開會議。

早前立法會審議《國歌條例草案》，民主派已經多次提出點算法定人數，同時又喺會上多次發言。雖然昨日大會冇乜爭議性嘅政府法案，但民主派又繼續點算開會法定人數，總共點咗七次，直到會議結束前，連同梁君彥喺開會時點人數，全日一共點咗八次，大概花了一小時三十六分鐘。睇番尋日會議議程，有部分譴責民主派議員嘅議案，唔知班民主派係咪因為咁而拉布喇。

一向流會最高危嘅時分都係中午時候，尋日中午一時五十二分發生流會，當時連埋立法會主席，會議廳只得三十四名議員，全部都係建制派。當時不在席嘅唔止全體民主派議員，仲有八名建制派，分別係蔣麗芸、陸頌雄、田北辰、梁美芬等五名經民聯議員。雖然流會，但梁君彥就宣布喺昨午二時三十分極速復會。

建制派提議採輪更制

流會正值中午時分，當時都有唔少議員食緊晏，包括黃碧雲在立法會餐廳食飯。至於建制派，梁美芬聲稱有其他事情要做，所以離開咗立法會，仲話私人會議已經盡量安排咗喺立法會大樓內進行，但難免喺其他地方有嘢做，仲提議過建制派不如「輪更」添。其實現時流會都冇乜所謂，因為主席可以決定短時間內復會，唔知係咪咁令到班建制派議員對點人數冇咁緊張呢？