中環出更：梁家榮再跪 認港台節目有錯
香港電台節目多次被批評立場偏頗，顧問委員會指港台對《香港電台約章》嘅落實有嚴重落差，因此成立工作小組尋求可行機制。工作小組尋日召開首次會議。廣播處長梁家榮繼上月向感到冒犯嘅市民致歉後，尋日喺工作小組會議上再次「跪低」，承認部分節目嘅準確性方面出現問題，承諾會更改及道歉，更有委員向梁反映，指節目嘅法律底線是不能惡意中傷任何人，希望未來製作嘅節目可避免。喺恪守一國原則上，各委員及梁家榮意見一致，均表示同意。
顧委會主席陳建強喺會前表示，將向梁家榮和港台管理層坦誠反映有關港台編輯方針、節目質素同標準嘅意見，佢指今日有八名小組成員開會，等於顧委會開會最低人數，相信可代表顧委會大部分意見，談及嘅內容將會再帶到顧委會討論，稍後向廣播處長作出正式建議。佢亦強調港台日常工作、人事或管治管理工作並非顧委會範疇，今次會議主要希望反映社會對節目嘅睇法。
陳建強：有需要會約見部分員工
至於會議討論會否針對個別節目，陳指顧委會對港台有節目被通訊局警告及嚴重警告，深表失望。陳重申港台節目必須恪守《約章》，期望顧委會與港台嘅聯繫更加緊密，會藉着工作小組同梁多加見面，如有需要亦會約見部分員工。陳亦強調委員並無向梁施壓，亦並無就節目製作提出任何指示，所提供嘅意見都只係方向性。
卓妮