政情：臭水之亂換地氈耗10萬 陳克勤籲追討維修費
立法會喺上周審議《國歌條例草案》期間，議員陳志全同朱凱廸喺會議廳內灑潑液體，搞到會議廳內傳出陣陣惡臭，幾個議員位置都受牽連污糟咗。事隔差唔多一個星期，臭味都冇減少到，搞到議員田北辰（田二少）要逃離自己嘅位置，甚至連坐開嗰張櫈都換埋，就連地氈都要換啊！
議員陳克勤尋日就喺社交平台發文，指秘書處已經為會議廳部分位置換上新嘅地氈，從相片當中可見到陳企喺新嘅地氈上面，同附近嘅地氈顏色係有唔同。陳話部分嘅座椅同埋會議枱都可能因為臭水事件而需要更換，總開支分分鐘高達十萬元添啊！
到底需唔需要向陳志全同朱凱廸追討維修費呢？陳指有網民留言話，維修同清潔費一定要陳志全同朱凱廸全數負責，唔可以放過佢哋。又有網民指清潔費係用緊納稅人嘅錢，不如索性扣佢哋人工，仲形容佢哋兩個嘅行為「小學雞」。