政情：停發短評 梁栢賢粉碎復出傳聞
新冠肺炎疫情肆虐，大家除咗每日留意政府發布嘅消息，都睇多咗好多抗疫方面健康嘅資訊。香港醫院管理局前行政總裁梁栢賢都有係社交媒體發文，不時發表短評分析一下香港嘅疫情發展同畀吓意見。不過有人就質疑梁咁勤力寫評論唔通係想重出江湖？不過梁尋日就話自己嘅短評會告一段落，粉碎復出江湖嘅傳聞！
梁今日喺社交媒體發文，話香港嘅疫情有緩和趨勢，相信今日嘅確診數字會同過去幾日一樣，維持喺低水平，而佢嘅短評亦都會告一段落。佢又多謝網友嘅意見同埋支持，祝願各地嘅疫情可以早日完結啦！梁終於身體力行證明咗自己寫評論唔係為咗將來復出而鋪路。
澄清擱筆非受壓
有唔少網民都留言向佢嘅短評表示謝意，有人多謝佢為大家提供好多嘅專業分析同寶貴意見，話佢嘅客觀評論為香港市民大眾帶嚟希望添！
亦都有人問梁栢賢點解要擱筆，係咪受到壓力，梁就澄清無壓力，如果疫情轉差，會再度執筆寫短評o架！