政情：叫人吔蕉連皮 劉國勳惹負評
叫人「吔蕉」通常係嗌交時嘅晦氣話，議員劉國勳日前喺社交網站自爆「吔蕉」，不過佢今次唔係同人頂頸，而係介紹「吔蕉」嘅方法，仲要連埋皮一齊食，口味咁獨特，恐怕唔係咁多人接受到嘞。由佢嘅貼文可見，將連皮嘅香蕉，混同奇異果一齊放入攪拌機，炮製成糊狀嘅奶昔，雖然佢大讚好味有營養，不過網友嘅留言回應，似乎都係負評居多。
稱有營養 被質疑邋遢
劉國勳解釋，話《農業期刊》曾刊登一項研究，指熟透嘅香蕉外皮所含嘅血清素，較果肉高出幾倍。如果想攝取較多嘅血清素，就不妨連蕉皮都食埋落肚喎。儘管有好多生果嘅外皮係可以食用，但前提係要肯定冇受農藥污染先至得，於是好快就有網友話「香蕉皮好邋遢o架，唔好呀。」又有人留言「肚痾」兩字。雖然蕉皮係含有豐富血清素啫，但攝取咁多血清素到底有乜嘢好處呢？劉國勳就無回應喇。
