政情：楊彧晤穆斯林團體 了解困境
禁聚令嘅影響範圍，就連穆斯林嘅宗教活動都難以幸免。深水埗區議會主席楊彧日前同穆斯林團體見面，了解到疫情令到穆斯林團體出現經濟難題，不但每逢星期五嘅祈禱及交流，都無法進行聚會，而即將到臨嘅齋戒月，都有可能無法參與。
倘禁聚令延長 齋戒月活動告吹
楊彧指齋戒月對於穆斯林嘅重要性，就好似我哋（中國人）過農曆新年，一眾穆斯林會喺呢個月禁食、祈禱同閱讀可蘭經。根據伊斯蘭曆法，今年嘅齋戒月係由四月廿四日開始，恰好係禁聚令結束嘅翌日。不過目前無人可以預料疫情會否持續受控，所以信徒都好擔心，政府一旦延長禁聚令的話，齋戒月活動就要告吹。楊彧又認為，長遠而言，教徒需要有自己聚會同聯繫嘅地方，但以往政府喺呢方面完全無協助，所以呢個係嚟緊區議會要跟進嘅一大課題。楊彧話已經聯絡民政署，希望署方可以安排唔同嘅政府部門一齊出席會議，同穆斯林代表傾吓點樣喺抗疫同信仰之間取得平衡。