政情：留守武漢 馮浩賢憔悴嘆四「了」
內地新冠肺炎疫情已穩定下來，目前仍然留守武漢的香港駐武漢經濟貿易辦事處主任馮浩賢（Vincent）前晚（10日）在社交平台分享近況，為駐守當地三個幾月的工作及生活作出總結。Vincent用四個「了」來形容自己的健康狀況變化，包括體重輕了、血壓高了、皮膚差了及頭髮長了，真係辛苦晒。
今年一月廿三日已經開始留喺武漢嘅Vincent話，三個幾月嘅身體變化，皮膚差咗同頭髮長咗，但體重輕咗反而係好事，可惜只係輕咗幾磅，BMI指數仍然肥佬。由於工作壓力太大，飲食唔定時同唔均衡，搞到血壓都高咗，醫生都叫佢改變吓生活方式，否則要長期食藥。
人事安頓好才能回港
咁點解皮膚會差咗呢？佢解釋，因為接觸得太多酒精同洗潔精，雙手都變咗「主婦手」。但呢方面就唔只佢係咁，全世界嘅人都係咁啦。至於儀容，佢大嘆當地冇得剪頭髮，亦唔敢隨便落街剪，所以連頭髮都長咗；咁咪剪髮錢都慳埋？好多老友都問佢點解至今仲唔返香港呢？佢就話交代好辦公室嘅事，將需要協助嘅人安頓好後，就會返屋企喎。