政情：團體貼文叫捐薪 沈豪傑話仲諗緊

話說元朗監察議會聯盟喺政府宣布減薪後，隨即上載一張「不要齋噏、全港區議員凍薪捐人工」嘅宣傳單張，叫班區議員捐出三萬幾港元嘅月薪買口罩畀市民，唔好只係識得用公帑幫自己做門面咁話。

聯盟不單止喺單張入面hashtag晒十八區區議會，又話「做得議員畀啲承擔」，仲喺貼文hashtag埋「特首都捐人工同減薪」同「民意代表呢」咁畀壓力班區議員添啵。沈豪傑（Wilson）回應查詢時就話，其實自疫情開始以來，佢都自資咗六位數字買防疫物資派街坊，只係冇特別公開講過。

憂對其他區議員構成壓力

咁即係今次捐唔捐人工啊？Wilson就話，見到世界各地好多高官高管都減薪，佢都覺得有能力嘅要做到幾多得幾多。不過，有啲同事真係以區議員份人工為生計，可能唔方便捐人工，所以佢依家都仲諗緊，想同佢哋傾好再決定，免得令佢哋有壓力咁話。