政情：八網難逃：無嘢好做 余德寶廁所舉啞鈴

正常人入洗手間不外乎沖涼、洗手、大小二便、照鏡梳洗、清潔等。估唔到公民黨區議員余德寶（Andy）有一番新體會，就係喺廁所入面舉啞鈴，練大隻呀！Andy尋晚喺社交網站上載圖片，貼文話媽媽同佢講，見佢呢段時間肥咗，係時間去做吓運動。雖然Andy擁有健身中心嘅會籍，但礙於疫情，紛告停業無得去。結果佢食完晚飯掙扎咗一輪，都係的起心肝舉番幾下啞鈴。咁點解間屋有咁多地方唔去，偏偏係要去廁所舉啞鈴呢？佢話係土地問題喎。