政情：全城搶口罩 蔡海偉：見盡無私與貪婪
香港社會服務聯會行政總裁蔡海偉日前以「貢獻所長、繼續拚搏」為題撰文，形容現時席捲全球嘅世紀疫症，令大家同時見到世人嘅無私同貪婪。佢話，早前全城搶購口罩，有藥房將原本每盒售價四十元嘅口罩，改以七百元出售；但幸好有朋友設法喺海外搜購一萬盒口罩，並以每盒廿幾元嘅成本價轉讓畀社聯，佢哋先可以為院舍同家居照顧者提供到基本防疫裝備。
「勿以善小而不為」
蔡海偉又形容，訂購同派發口罩近期成為好多人嘅副業，同埋好多人嘅戒心都高咗，因為要提防無良商人會使出詐騙伎倆。不過，佢就覺得「勿以善小而不為」，形容大家作為普通市民，雖然唔係好似醫護人員咁樣喺前線拚搏，但每個人都可以有自己嘅角色同貢獻，仲話若果大家喺危急關頭時仍然諸多計算，過後只會令自己內疚。
蔡海偉又引用英國大文豪狄更斯筆下《雙城記》嘅經典對白：「這是最好的時代，也是最壞的時代！」佢就覺得依家疫情發展雖然未必咁樂觀，但仍然有好多香港人喺困境中展現專業同善良嘅一面，一齊為香港呢個家付出咁話喎！