政情：1823無人聽 創科局死撐已有進步
政府早年推出「1823政府一線通」，方便市民可以透過一個熱線，就可以向多個指定政府部門查詢服務，以及處理投訴。不過，1823自推出至今，長年被狠批無人接聽，熱線形同虛設。之但係，當局回應議員書面質詢時透露，舊年1823嘅表現竟然有進步？
提升百分之一
創新及科技局提到，1823喺一八年只能夠喺十二秒之內接聽六成七來電，但一九年嘅處理情況就提升至六成八。換句話講，即係有百分之一嘅進步咁大把啦，但其實仍然遠低於政府所定下、十二秒之內要接聽至少八成來電嘅目標。當局解釋，市民來電要等幾耐，係受到來電量、整體來電處理時間同員工人數等因素所影響咁話喎。
當局又話，1823喺舊年曾協助處理大量有關「關愛共享計劃」同出售居屋項目等來電，接獲市民嘅來電數目由前年嘅三百七十萬，上升至舊年嘅四百五十萬。之不過，睇番1823喺網頁嘅數字，今年頭兩個月嘅服務表現跌至六成一，睇嚟有關部門仲有好多進步空間喇！