政情：梁福元父子區選敗陣 梁明堅：地區工作唔會停
新一屆區議會選舉已經塵埃落定，其中元朗區議員梁福元同梁明堅父子，分別參選元朗十八鄉西同十八鄉中選區，但最終都雙雙落選，無緣下一屆區議會議席，梁福元更加係僅以三百票之差輸咗畀對手司徒博文，至於梁明堅則少方國軒逾千票。
問番梁明堅之後有乜打算？佢就表明地區工作係唔會停，會持續不斷服務社區，例如大會堂、體育會、文藝協進會同十八鄉區居民協會等等，仲話自己係唔會氣餒o架，又話做慣服務，會以另外一個身份繼續服務社區咁話。
未諗下屆 先專注公司事務及湊女
梁明堅仲提到，選舉無論如何都有贏輸，冇話一定贏o架，而自己睇贏輸唔係咁重要，反而覺得盡咗力就得嘞！至於下屆會唔會參選都係未知之數，到時再重新定位喇，會成個團隊去計劃下一步應該點行，不過詳細就真係要之後再諗，現階段都係搞公司嘢，發展經濟為主喎，同埋有時間就湊吓三個女咁話。