政情：羅少雄回想昔日提款機 額度太低冇人用
身上帶唔夠現金，走去櫃員機撳錢就得，但咁輕而易舉嘅事，自動化未完善嘅年代實在難以想像。人稱「四哥」嘅互聯網專業協會副會長羅少雄話撳機攞錢，四十年前香港就有，但礙於提款額有限制，導致銀行客戶寧願排隊到櫃位攞錢，都唔願意使用自動提款。
以前喺銀行任職嘅四哥，對於銀行點樣將業務自動化，可謂知之甚詳。佢話早期嘅自動化提款科技，提款卡仿似打咗幾個窿嘅港鐵單程車票，而每次撳機，提款金額一律固定二百五十元，至於Beta版本就再少啲，撳一次機得二百元，若果要攞三百元呢？咁就要靠銀行出納員嘅服務喇！
現代提款卡亦應改良 與時並進
四哥話後來提款卡背面嘅磁帶技術，隨着電腦Floppy碟時代嘅來臨而大幅改進，得以放寬自動提款金額嘅限制，配合升級為櫃員機嘅多功能服務。雖然今日提款卡係尋常之物，但佢認為必須兼具信用卡或八達通卡功能，先至唔會畀人束之高閣咁話。