衰世瘟疫特別多 治鼠無方埋凶兆

內地豬年勁爆豬瘟,搞到豬肉價格長漲不下,百姓冇啖好食;之不過,豬瘟未退,鼠年未來,鼠疫竟提早殺到,疫情兇猛,家陣已最少有四宗確診個案,中港交流頻繁,值此衰世,鼠疫會唔會殺入本港,邊個話得埋啊!

各位街坊,鼠疫主要分為腺鼠疫及肺鼠疫,前者通常以鼠代表嘅嚙齒類動物身上嘅跳蚤叮咬傳染畀人類;後者則可透過飛沫及痰液傳播,在人群中傳播風險較大。開講都有話,小心駛得萬年船,功夫茶深知生命冇take two,在此順道單聲,如去過有關疫區,要特別留意自己身體狀況!嗱!呢個廢柴政府,唔係怠政,就係口水多過浪花,嗶哩巴啦,又係聲大大冇貨賣。

呢!全球至今記錄咗九宗人類感染大鼠戊型肝炎個案,香港包辦咗八宗!厲害了,唔使加油,都輕易醜出國際啦!香港真係步入衰世,好嘢唔見,瘟疫特多。鼠患向來嚴重,政府跨部門治鼠,好叻o架,搞咗好多區「老鼠樂園」出來!嗱,有啲地區如海怡半島、黃大仙,前者鼠患參考指數全港最低,後者亦喺全港十九個地區屬第二低。結果係鼠蹤處處,嚇到居民死死吓,證明數據靠唔住!其他食肆林立嘅地區如油尖旺、深水埗、九龍城、觀塘等,仲使問阿貴,肯定係老鼠嬉春繁殖嘅天堂啦!

「東方報業民意調查」顯示,絕大部分受訪者批評香港衞生環境惡劣,三無大廈尤其烏煙瘴氣,官僚各自為政,唔踢唔郁係主因。仲有喎,港府喺今年五月啟動全城清潔運動,截至十月已檢獲近兩萬隻老鼠,比去年同期急增逾四成,沾沾自喜話滅鼠初見成效。好心啦,擺明之前唔做嘢就真!本報讀者就心水清啦,四成四人批評捕鼠急增,係當局一直無針對衞生環境問題作出改善,逾兩成人仲鬧爆政府長年縱容鼠患所致。一句到尾,所謂全城清潔運動,咪就係後知後覺一場騷囉。

嗱嗱嗱!有玄學家就話明年係鼠年,「太歲當頭坐,無災也有禍」,內地鼠疫會進一步爆發,而病符星飛臨南面,香港亦有機會爆發鼠疫等傳染病;亦有堪輿學家提醒,今年立春日火過旺,引發示威衝突,明年局勢受病符星影響,八成機會有鼠疫問題!呢,千祈咪以為有關言論導人迷信,功夫茶相信呢啲係一個警號,亦為廢柴政府敲起警鐘:天道無親,唯德是輔。政府管治無方,好多天災其實係人禍!

功夫茶再一次摑醒冇靈魂政府,再不作為,一味搞跨部門會議做大龍鳳係冇叉用o架!三司十三局齊齊行動起來,喂!每人至少一個月幫手捉四隻老鼠先好出糧啊!