政府部門施政混亂，真係五花八門，無奇不有！早前先畀審計署炮轟翻新公廁，搞咗成八年都未掂！功夫茶心諗，管治無能成咁，啲高官坐享高薪厚祿，會唔會覺得燒了三炷香，放了七個屁——自己都會覺得唔好意思呢？
睇怕就冇啦！嗱，記者走訪幾個政府建築物內嘅職員飯堂，有房委會及醫療輔助隊總部內嘅餐廳、黃大仙紀律部隊宿舍及上水已婚警務人員宿舍內嘅餐廳，呢啲飯堂或者餐廳，話明只招待職員或授權人士，甚至門口有告示「任何人士未經許可，請勿擅自內進」。
之不過，記者於晚市時段，到何文田嘅醫療輔助隊總部大樓內餐廳實地視察，發現不斷有街外食客公然進入飯堂用餐，接待處嘅保安員根本無查問身份噃，咁都得？
記者本着「實踐是檢驗真理嘅唯一標準」科學精神，大剌剌走入去，並在大樓內逗留咗成粒鐘，印印腳、剔吓牙，期間完全冇人查問身份，於是記者斗膽得出結論，整座大樓根本就猶如「無掩雞籠」！
其後記者又去過幾間政府部門嘅飯堂，好似黃大仙紀律部隊宿舍，因反修例風波圍滿水馬，之不過街外人仍可以「食飯」為名，自由進出宿舍，設於宿舍地下嘅餐廳，規定只能招待住戶，記者以電話查詢時，餐廳職員表示可以接待街客，更教記者如何繞過宿舍正門水馬，從側門入去就聞到飯香。嘻，唔通真係「食飯大過天」？呢，上水已婚警務人員宿舍內嘅餐廳，一樣橫行直過，根本無人會理你。
各位街坊，政府建築物之有關飯堂，啲告示根本就係虛張聲勢，好似有啲鄉下地方，屋主喺鐵閘貼上「內有惡犬，切勿靠近」，其實裏面連芝娃娃都冇隻！依家啲政府建築物飯堂，所貼嘅「外人不得擅進」就係用來嚇鬼——都唔靈！網上甚且有留言話晚市「對外開放」添！
呢啲紀律部隊宿舍內嘅合作社餐廳經營者，話就話租金較低，不過客源狹窄，冇街外客難以生存。不過又唔係寬鬆到完全無王管啩？喂，家陣警民關係乜環境，唔使功夫茶多講一句吧！尤其紀律部隊宿舍飯堂中門大開，在此非常時期有乜理由連登記吓身份證都慳番啊？堡壘最易從內攻破，咁嘅意識都冇，難怪止暴制亂兩頭唔到岸咯！
開講都有話，無規矩不成方圓，家陣成個香港禮崩樂壞、法治淪喪，政府飯堂如無掩雞籠，難怪連公務員都籠裏雞作反，吃飯砸鍋，參加非法示威撐暴！一葉落而知天下秋，香港搞成今日，廢官朽木充棟樑，「一國兩制」梗係危危乎喇！