政情：審議法案鬥離題 議員互寸冇政治智慧
立法會大會尋日繼續審議《二○一九年選舉法例（雜項修訂）條例草案》，呢條條例草案原本只係就選舉相關事宜作出技術上嘅修訂，但係班立法會議員就講到離晒題，其中民主派議員區諾軒更乘機喺度批評立法會選舉嘅功能界別，講講吓仲拉埋政改嚟講。建制派議員梁美芬就質疑，冇可能一下子就可以普選，仲話區冇政治智慧，搞到身為梁美芬黨友嘅立法會主席梁君彥都好頭痕，多次叫大家唔好咁過分，但似乎就冇咩用喇。
梁君彥多次勸架不果
尋日大會討論嘅條例草案原本只係就選舉法例作出一啲技術上嘅修訂，包括部分立法會功能界別及一般選舉委員會界別分組嘅組成人士嘅名單、提交選舉申報書嘅期限、提交提名表格嘅方式、候選人可免付郵資信件尺碼同厚度等。呢啲事宜本來冇乜爭議，但班議員發言時就講到離晒題。其中曾參選立法會批發及零售界嘅區諾軒會上就批評功能界別極其黑暗同黑箱作業，形容係交錢畀商會先有資格投票，質疑係咪做生意一定要入商會。之後佢又拉埋《基本法》嚟講，質疑部分議員持外國國籍或雙重國籍，唔夠愛國愛港，仲問佢哋係咪要被「DQ（取消資格）」。
稱當年政改應袋住先
曾於角逐立法會主席時鬧出國籍風波嘅梁君彥鬧區諾軒離題，區就話︰「放心主席，唔係講緊你」，叫梁君彥唔需要「崩口人忌崩口碗」。唔知係咪身為梁君彥黨友，覺得要替梁君彥還擊，梁美芬就叫區應該返去讀吓《基本法》，又話因二○一五年政改「肥佬咗」，依家先要講呢啲雞毛蒜皮嘅事，矛頭直指泛民議員當年唔撐政府政改方案。梁美芬又話，當年有政改就應該袋住先，冇可能一下子就即刻百分百搞掂普選，仲話咁先係《基本法》講嘅循序漸進，攬炒幫唔到件事，直斥區冇政治智慧。
之後發言嘅議員唔知係咪有樣學樣，個個都講到去火星，其中議員蔣麗芸就提到之前有選舉主任被恐嚇，又話自己到依家都未聯絡到對方，唔知對方是否安全。議員麥美娟就批評選舉事務處曾遺失選民登記冊同載有選民資料嘅手提電腦，揶揄選舉事務處係「黑洞」。最後梁君彥都無能為力，惟有多次重申是次會議應該討論技術性雜項修訂，唔好過分論述其他無關事宜，最終三讀通過條例草案。立法會成日口水多多又議而不決，唔怪得外界成日批評議會效率低喇。