政情：傷賣旗童心 鄭松泰捱轟

網民熱議 斥「唔買咪行開囉」

鄭松泰喺fb指出，當日有一位年約四、五歲左右嘅小朋友，上前向佢打招呼同呼籲佢買旗支持愛護動物協會。但佢拒絕，並向嗰個小朋友話，「多謝你，但我唔鐘（鍾）意呢間機構，因為佢每年殺好多好多貓貓（口架）」。隨後一名女子即上前拉走小孩，鄭松泰問該女子，想唔想知道點解唔應該支持愛協，該女子回覆：「得嘞，知道嘞，乜都政治化」，而鄭松泰則喺貼文尾指出，「香港就是一個童話世界，從小開始我們學懂閉眼過活」。佢及後喺留言話：「我覺得最可惡是利用童真，但轉頭抹殺童真」。

貼文引起網民熱議，有網民批評鄭松泰「唔買咪行開囉」、「點解要傷小孩的心」，又有網民直斥佢冇實質同建設性嘅解決方法，愛護動物協會依家做醜人，做咗好多機構唔做嘅嘢。另有網民撐鄭松泰，指愛協舊年共人道毀滅咗二千多隻動物，呢個議題同政治化無關，「咁都關政治事？個家長到底識唔識分？」本報曾聯絡鄭松泰，至截稿前未獲回覆。

愛協：反對人道毀滅健康動物

愛協發言人承認，二○一四至一五年度，有二千二百隻有病動物需人道毀滅，因安樂死是保障動物，以防受苦，重申強烈反對人道毀滅健康動物。早前有傳理大校董會成員劉炳章，喺校董會要求大學解僱經常發表激進言論嘅鄭松泰，喺上月中旬佢先獲校方通知續約一年，有別於其他教師嘅合約，一簽就係兩至三年。唔知今次嘅風波又會點收科？