中環出更：單仲偕倡區會主席任期改兩年 添煩添亂
今屆區議會選舉民主派取得十七個區議會主導權，隨即已經動作多多，日前已經聲言要喺全港十八個區議會成立常設監察警方執法委員會，喺今次區選中當選葵青區議員嘅民主黨（白鴿黨）單仲偕（先刂雞）更提出將區議會主席任期由四年改為兩年，即係話區議會任期去到一半，又再重新選主席，有建制派即刻批評呢個建議會令議員難以適應。而且班議員隨時每兩年就為角逐主席寶座爭崩頭，真係添煩添亂。
主席寶座隨時爭崩頭
區選過後各黨派都開始討論區議會正、副主席事宜，有唔少意見認為應由資深區議員出任主席。而曾出任葵青區議會主席嘅(先刂)雞接受訪問時就提出，主席任期由四年一屆改為兩年。而佢亦都會出任葵青區議會主席，仲話希望同樣順利連任葵青區議員嘅黃潤達可做副主席。有泛民中人就話，的確有人提議過唔同嘅方法，包括以輪任方式畀議會新丁試吓，又或以公投、得票等去分配，但暫時未有共識。此外，白鴿黨亦提出將新任正、副主席薪金扣除一般區議員薪酬後，剩餘部分用嚟支援民主運動。
有建制派資深區議員就話，薪金點用應該由區議員自己去決定，至於更改主席任期，因每人主持會議作風不一，擔心兩年換一次主席嘅話，議員就要再重新適應，認為新丁可試吓做工作小組或事務委員會主席，如一當選就做區議會主席，可能會難以服眾。
卓妮