政情：阿人料任新工黨主席

尋日阿人話，成立典禮會遲啲先搞，事關十八日嗰日要處理唔少程序，到時主席之位會以一人一票方式選出，三位副主席、司庫及秘書長，則由廿一名執委互選。雖然暫時得阿人報名選主席，但都要投信任票決定，不過阿人應該坐定粒六架喇！

據講新工黨會有團體會員，包括物業管理工會、新巴工會、九巴工會及公民起動，新巴公會仲好慷慨，以友情價租出部分地方畀新工黨落腳。阿人講講吓，工聯會議員黃國健咁啱路過，立即恭喜準主席阿人，阿人即時笑到見牙唔見眼。