政情：議員唔見影 工黨記者會險收檔
立法會大樓內有唔少會客室，可以畀人開會或者記者會，但規定每次都要有一名現任立法會議員在場。不過，工黨尋日就被斷正，衰喺盡責保安手上，搞到記者會一度打斷，差啲就要收檔嘞！
現時立法會中只有議員張超雄係工黨代表，尋日就為黨友預約房間進行記者會，但開始無耐，就有保安到來指在場無現任立法會議員，由於記者會已經開始，工黨主席郭永健亦都發言中，所以被保安中斷搞到氣氛尷尬。
譚文豪到場做救星
期間保安不停使用通訊器材同人聯絡，但張超雄又遲遲未見人，搞到狀態膠着，乜都唔做得。不過，突然有救星駕到，就係非工黨成員嘅議員譚文豪進入會客室，令到工黨符合使用會客室嘅要求，所以保安都收貨離開，工黨一眾成員可以繼續記者會喇！